Hiligaynon News: Pagpaseguro sang kahilwayan sang mga Filipino sa Korea ginmando ni PNoy

PIA Press Release
2010/11/26

Hiligaynon News: Pagpaseguro sang kahilwayan sang mga Filipino sa Korea ginmando ni PNoy

Manila (26 November) -- Ginmanduan ni Pangulo Benigno S. Aquino III ang Department of Foreign Affairs (DFA) kag ang iban nga mga ahensya sang gobyerno nga may katungdanan sa mga Filipino nga naga trabaho sa luwas sang pungsod nga magpatigayon sang mga precautionary measures agud maamligan kag mapaseguro ang kahilwayan sang linibo sang nasambit nga mga manog-obra sa Korean Peninsula.

Ang mando ginhimo ni Pangulo Aquino kasunod sang pagbaylohanay sang lupok sang mga pungsod sang South kag North Korea, kag bilang kabahin sang pila na ka mga tikang nga ginhimo sang gobyerno may kaangtanan sa hitabo.

Sa isa ka mensahe sa text nga ginpadala sang Pangulo sa mga mamahayag nga napahamtang sa Malacanang, ginpahayag niya nga maid-id nga ginabantayan sang gobyerno ang sitwasyon kag subong man nga nagmando na siya sa mga ahensya nga natungdan nga lantawon liwat ang ila mga plano tuhoy sa pagpaseguro sang kaluwasan sang mga Filipino didto.

Wala sapayan nga wala sang plano nga bakwiton ang mga Filipino sa South Korea, nagpasalig ang DFA nga masarangan nila nga himuon ini kon kinahanglanon gid man. (PIA 6)