Hiligaynon News: Pagpabilin sang 'competitiveness' sang pungsod sa ICT, BPO patigayunon sang gobyerno

PIA Press Release
2010/12/06

Hiligaynon News: Pagpabilin sang 'competitiveness' sang pungsod sa ICT, BPO patigayunon sang gobyerno

Manila (6 December) -- Patigayunon sang gobyerno nga mapabilin ang ginatawag nga "competitiveness" ukon ikasangkol sang Pilipinas sa mga merkado sang Information and Communication Technology (ICT) kag Business Process Outsourcing (BPO) kon sa diin kalakip ang mga call centers.

Ini ang ginpanaad ni Pangulo Benigno S. Aquino III sa atubang sang mga katapu sang Computer Manufacturers, Distributors and Dealers Association of the Philippines (COMDDAP) sa tion sang ginhiwat nila nga Expo Manila 2010 sining karon lang.

Kalakip sa mga tikang nga ginahimo sang iya gobyerno agud dugang nga mapauswag ang nasamibit nga mga sektor sang industriya ang pagpaayo sang Digital Infrastructure kag Connectivity sa bug-os nga pungsod, pagpahamtang sang nagakabagay nga mga polisa, kag pagpasanyog sang kinaadman sang mga Filipino nga magatrabaho sa mga kompaniya sa ICT kag BPO.

Ang Pilipinas nagapangatlo na sa subong sa pangkalibutanon nga merkado sang BPO nga may kita nga naglab-ot sa US$7.3 bilyones sang tuig 2009 ukon 20 porsiyento nga mas mataas sa nagligad wala sapayan sang global economic crisis. (PIA 6)